ММ агентлаг ташаарав уу?

Усны тухай хуулийг зөрчиж барилга барьж Туул голын эко системийг алдагдуулж байна гэсэн сэдвээр алдарт Цагийн Хүрд сурвалжлага хийж мэдээллээ.  5-р сарын 16-ны дугаартаа энэ тухай хөнджээ. Туул голын онцгой болон энгийн хамгаалалтын бүсэд барилга барьж байгаа нь Усны тухай хууль зөрчиж байна гэжээ.

 Тэгвэл  Онцгой болон энгийн хамгаалалт гэж юу  вэ? Усны тухай хуульд зааснаар онцгой хамгаалалтын бүс нь голын эргээс 50 метр зайд багтах газар юм байна. Харин энгийн хамгаалалтын бүс нь гол усны эргээс 200 метр зай дотор багтах  газар гэж заажээ. Энгийн хамгаалалттай бүсэд мөрдөх дэглэмийн журмыг байгаль орчны болон  газрын харилцааны асуудал эрхэлсэн Засгийн газрын гишүүн батлах ёстой  гэнэ. Тэгэхээр тэр журамд энгийн хамгаалалтын бүсэд барилга байгууламж барьж болохгүй гэж заагаагүй бол Туул голын эргээс 200 метр дотор гэхдээ 50 метрээс хол зайд баригдаж байгаа барилга орон  сууцнууд дээр яриад байх асуудалгүй юм биш үү? Харин хуулиараа бол онцгой хамгаалалтын бүсэд барилга байгууламж барих болон бусад хуулинд заагдсан үйл ажиллагаа явуулахыг хориглосон байдаг юм байна.

ММ агентлагийн сурвалжлагч М.Бямбасүрэн

5-р сарын 16 -ны Цагийн Хүрд нэвтрүүлгээр сурвалжлагч М.Бямбасүрэн гэгч эмэгтэй Туул голын эргээс 200 метр зайд байх газрыг онцгой хамгаалалтын бүс гэж зарласан гэж ярьж байх юм. Харин 500 орчим метр зайд байх газар нь энгийн хамгаалалтын бүс гэнэ. Энэ сурвалжлагчийн хэлж байгаа тоо Усны тухай хуульд бичсэн тоонуудаас зөрж байна. Хууль нь өөрчлөгдсөн юм уу гэтэл  УИХ-ын дарга Д.Дэмбэрэлийн мутарласан 2012 оны 5-р сарын 17-ны шинэчилсэн хувилбараас өөр сүүлд гарсан хууль алга. Бямбасүрэн бүсгүй хаанаас энэ тоонуудыг (онцгой хамгаалалт нь 200 метр, энгийн хамгаалалт нь 500 метр) авсан юм бол.

Тэгвэл БОНХЯ-ны газрын дарга нар болох Т.Эрдэнэчимэг ба Б.Гантулга нар Туул голын эрэгт ойр баригдаж байгаа болон баригдсан барилгууд хууль зөрчсөн гэж бас ярьж  байх юм. Бямбасүрэн сурвалжлагчийн хэмжүүрээр тооцвол голын эргээс 150 метрт баригдаж байгаа барилга  "хууль зөрчсөн" болох гээд байдаг. Гэтэл Усны  тухай хуулиар тооцвол дээрх барилга хууль зөрчөөгүй болох гээд байдаг.  БОНХЯ-ны газрын дарга нар хуулиа мэддэг баймаар л юм. ММ агентлагт "байцаагдсан" дарга нар хууль зөрчсөн гэх барилгуудын тухайд өөр өөр байр суурь баримталж байх юм.  

Т.Эрдэнэчимэг

Байгаль Орчин, Ногоон Хөгжлийн Яамны (БОНХЯ) Тусгай хамгаалалттай газар нутгийн удирдлагын газрын дарга  Т.Эрдэнэчимэг хэлэхдээ  тэдгээр аж ахуйн нэгжүүдийн  газрыг чөлөөлүүлэх арга хэмжээ авна гэж байна.

Гэтэл БОНХЯ-ны  Бодлогын хэрэгжилтийг зохицуулах газрын дарга  Б.Гантулга  шал өөр юм ярьж байх юм. Энэ нөхрийн хэлж байгаагаар  голын эрэг дээр байгаа барилгуудыг бүгдийг нь буулгаад нүүлгээд шилжүүлж чадахгүй тохиолдолд ерөнхийдөө нөлөөллийг бууруулах стандартуудыг л хатуу бариулах ёстой юм гэнэ.

БОНХЯ-ны сайд С.Оюун нэг асуудал дээр  хоёр өөр байр суурьтай, хоёр өөр газрын дарга нарынхаа  талаар юу гэх бол? Нэг нь хуулиа барих ёстой гэж байхад нөгөөх нь эвлэрээд явахаас өөр аргагүй гэж байна. Гэтэл Усны тухай хуулиар ярьвал энгийн хамгаалалтын бүсэд барилга  барьж болохгүй гэсэн заалт алга байх юм. Аль нь зөв бэ, сайд аа?