Цагдаагийн шинэ хувцас

Цагдаагийн шинэ дүрэмт хувцас

Цагдаагийн хувцас бол тусгай зориулалтын дүрэмт хувцас. Гоёлын хослол биш. Ажиллах нөхцөл, орчин, ажлын онцлог зэрэг маш олон онцлогуудыг  харгалзаж, ажил үүргээ гүйцэтгэхэд нь  саад болохгүй, өмссөн хүнийхээ биед тохиромжтой, хөнгөн бөгөөд дулаахан байх гэх мэт шаардлагуудыг хангасан хувцас хийхийн тулд олон хүний санаа сэтгэл, хөдөлмөр, цаг хугацаа зарцуулсаны эцэст энэхүү зарим нэг "их мэдэгч цэцэн мэргэн" болжморуудын Твиттерээр "баба" гэж шүүмжлээд байгаа шинэ загвар бий болжээ. Тэмүүжин сайд ганцаараа гэртээ сууж байгаад зураад хийчихсэн эд биш л дээ. Муулагчидын нэг хэсэг нь   шинэ засгийг яаж муулах вэ гэхээс  бөгс нь загатнасан, өө сэв хайсан  юмнууд байгаа нь мэдээж. МАН-ын даравгар Цогоо гуай тэргүүн магнайд нь тууж яваа харагдана.

Шинэ загварыг хэн зохиосон бэ? ШУТИС-ийн Үйлдвэрлэлийн  технологи, дизайны сургуулийн Хувцас Судлалын Төвийн загвар зохиогчид, дизайнер, оёдлын технологич, эрдэмтэн багш нараас бүрдсэн 10 гаруй хүнтэй баг тусгай гэрээ байгуулан ажиллажээ. Төслийн явцад ЦЕГ, УМБГ зэрэг цагдаагийн байгууллагуудаас гарсан ажлын хэсэг дээрх багийнхантай  санаа оноогоо хэлж зөвлөн хамтран ажилласан байна. Мэдээж бусад орны цагдаагийн хувцаснуудыг ч судалж, дэлхийн нийтийн хандлагыг ч бас тусгаж өгсөн байна. Ялангуяа хар хөх өнгө нийтлэг болсоныг анхаарч энэ өнгийг сонгожээ. 

Миний бодоход муулаад байгаа хүмүүсийн  хэлээд байгаа шиг "муухай, доожоогүй" болчихсон юм алга. Мэргэжлийн хүмүүс аль болохоор бүх шаардлагыг хангасан, олон хүний санаа зөвлөлгөө тусгаж   хийсэн гээд байхад мэргэжлийн бус бид юу хэлэх билээ? Твиттер дээр зарим нь шинэ дүрэмт хувцастай цагдааг хараад "сүрдэх, бахархах сэтгэл төрөхөө байлаа" ч гэж байх шиг. Гаднаас харагдах байдал нь их "сүртэй" байх ёстой юм гэнэ. Амьтан хүн "сүрдүүлж" байх нь цагдаагийн зорилго биш юм аа. Их л сүртэй байвал "бахархах" юм байх. Бараг л Хитлерийн Германы үеийн цэрэг цагдаагийн дүрэмт хувцас шиг байсан бол таалах байсан бололтой.  Яг үнэндээ бол хувцас нь чухал биш, доторхи хүн нь чухал юм. Ажлаа яаж хийж байна гэдгээр нь бахархах, эсвэл  баалах тухай ярих ёстой юм. Харамсалтай нь гаднах өнгө үзэмж, харагдах байдлыг  илүү шүтсэн "болжморууд" цөөнгүй байгаа нь илт. "Улстөржиж" муулж байгаа хэсгийг бол ойлгож байнаа. Харин зөвхөн өнгөн талаас  нь харж "амаа билүүдэж" байгаа шувуухайнууд сайн бодоосой.