Он солигдох мөчид төрсөн бодол

Никитоны Батчулуун гавъяат боллоо

За шинэ он гарах гэж байгаа тул жаахан өөдрөг гэрэлтэй байж хуучин оноо үдье.  Ерөнхийлөгч маань 21 хүнд гавъяат цол олгожээ. Сайхан байнаа. Олон хүн гавъяат гэж дуудуулах гавъяа хийжээ гэж ойлгож байна. Учиргүй хавтгайруулаад шагначихсан юм ч алга.
Миний хайртай дуртай Никитоны Баачка урлагийн гавъяат болсон байна. Баяр хүргэе!
Никитон Монголын урлагт шинэ хуудас, агаар оруулсан гэдэг утгаараа яалт ч үгүй гавъяатай. Зарим хүн ахадсан байна ч гэх шиг юм ярьж байна. Гавъяаны цол ахадна гэж байдаггүй юм. Гавъяа байгуулсан л бол шагналаа авах нь шударга хэрэг. Хөгширсөн хойно нь, эсвэл үхсэн хойно нь нэхэн олгоод ч яах юм билээ. Залуудаа аваад улам урамшиж ихийг хийг л дээ.

Оюутолгойн баяжуулах үйлдвэрийн нээлтийн туузыг хайчилж бас нэг сайхан үйл явдал боллоо. Монголын  нэрийг гаргах үйлдвэртэй болж байна. Сайхан хэрэг!  "Мангас" Рио Тинто чадалтай гэдгээ харууллаа. Манайхан гэрээгээ шинэчилж өөрчлөлт оруулж чадмааргүй бол тэгээд орхихоос өөр аргагүй дээ. Харин дараа дараагийн томоохон төслүүдээ л аятайхан хийгээд явах хэрэгтэй. Алдаанаасаа сургамж авъя.

"Цахиур" Магнай

О.Магнай гэдэг "сайн эр" бий болоод гэмтэй хүмүүсийг гэлбэлзүүлээд эхэлсэн нь баярлууштай үзэгдэл бөгөөд ард иргэд ам сайтай байгаа. Орчин үеийн сайн эр юм уу даа. "Цахиур" Магнай гэдэг цол  өгвөл яасан юм?   Ерөнхийлөгчдөө уламжлая байз.

12 оны сонгуулиар сонгогчид маань өөр сонголт хийсэн сайхан жил. Одоо нэг  өөрчлөлт гарах байхаа гэж их найдаж итгэж байгаа. Гол нь нийт иргэдийнхээ эрх ашгийг хувь хүн, эсвэл бүлэг хүний эрх ашиг сонирхолоос дээгүүр тавьж байвал бүх юм бүтнэ дээ, бүтнэ. Хамгийн гол нь болж бүтэхгүй байгаа асуудлаа дор нь шийдээд эргээд мэдэгддэг байх, ажлаа хийж чадахгүй байгаа албан тушаалтан, алдаа гаргасан этгээдийг дор дор нь өөрчилж хурдан шуурхай түс тас байх хэрэгтэй. Цаг уясан, удааширч назгайрсан аливаа үйл ажиллагаа амьтны дургүй хүргэж залхаах гэмтэй.  Эрх баригчдын нэр хүнд тэр хэмжээгээр суларч муудах аюултай.

Монголчуудын итгэл сэргэж найдвар төрж эхэлсэн сайхан жил  байлаа. Ирэх 2013 ондоо засаг барьж байгаа нам хүчин нь зоригтой шийдэмгий ажиллаж, ард иргэд нь дэмжээд өгвөл  манай улс "бар" биш юм аа гэхэд "бамбар" болох боломжтой. Хүмүүсийнхээ ухамсарт өөрчлөлт хийх чухал жил , ирэх жил. Ялангуяа хуучин сэтгэлгээг арилгахгүй бол их саад болно шүү. Нөгөө бэлэнчилдэг, залхуурдаг зангаа мартахгүй бол болохгүй нь. Ажаад байхад  жаахан өлсөж, зовлон үзсэн ард түмэн талхны булангийн үнэ цэнийг сайн мэддэг юм шиг байгаа юм. Бидний Монголчууд Азийн бусад ард түмэн шиг айхтар өлсөж, дайнд сүйдэж байсан нь бага болохоор жаахан цамаандуу талдаа. Таван хошуу мал нь, тарвага гөрөөс нь өлсгөөгүй өдий хүргэсэн юм биз ээ.
Нэгтийн  дэвсгэрт мөнгө биш, 10000-тынх бол мөнгө гэдэг гажиг сэтгэлгээг өөрчлөхгүй бол явахгүй шүү, та минь ээ!

Ерөнхийлөгч Элбэгдорж  гэр бүлээрээ

За тэгээд болж өгвөл бие биенээ хайрын харцаар харж, нэг нь нийтийнхээ төлөө, нийт нь нэгнийхээ төлөө  гэсэн сэтгэлгээг хэвшүүлбэл ганц зөв зам чинь тэр дээ. Эх оронч байна гэдэг чинь бие биенээ хайрлахаас эхэлдэг гэж өмнө нь би бичиж байсан даа.  Монгол Улсын  Ерөнхийлөгч Ц. Элбэгдорж  энэ тал дээр үлгэр жишээ болж байгаа.  Тэр олон өнчин  хүүхдүүдийг өргөж аваад өсгөнө гэдэг чинь нэгд, хүнлэг хүн гэдгээ харуулж байна, хоёрт, олон сайхан зөв иргэнийг Монголд бэлдэж өгч байгаа нь улсдаа оруулж байгаа том хувь нэмэр гэж ойлгож байна. Манай чинээлэг амьдралтай, санхүүгийн хувьд боломжтой иргэд маань өнчин ядуу хүүхдүүдээс өргөж аваад хүн хийвэл их буян болно доо. Өргөж авахаа байг гэхэд тийм хүүхдүүдэд хөрөнгө оруулж зөв хүмүүжилтэй, мэргэжилтэй иргэн болоход нь нэмэр болоосой. Энэ чинь бас эх оронч гэдгээ харуулах нэг баталгаа юм шүү дээ.

Аливаа ажилд саад хийгч, эсэргүүцэгчдийг улайтал нь хэлж тал талаас нь зад шүүмжилж сурцгаая. Шинэчлэл өөрчлөлт ямагт талархал хүлээдэггүй  учраас зарим үед төр төмөр нүүрээ гаргах хэрэгтэй. Нийтийн ашиг сонирхол хэзээд нэгдүгээрт гэдгийг хатуу мөрдөөд явахгүй бол ажил огт урагшлахгүй. Нялцгай бодлого, туйлбаргүй байр суурь шинэчлэлд  саад болно.
Төр засгийн албан тушаалтан хэн ч бай харьцааны соёлд суралцаж, үйлчилгээний ажилтан гэдгээ мартаж болохгүй. Дарга гуншинтай болгон өөрийн удирдлага дор байгаа  ажилтнуудынхаа удирдагч, толгойлогч, зохион байгуулагч болохоос биш төр засгийн үйлчилгээ авч байгаа иргэн миний дарга БИШ шүү гэдгээ мэдвэл зохино. Дарга болчихоод  хүн бүхэнд "даргалах" дон туссан хэнийг ч бай үтэр түргэн зайлуулж байгаасай.

Хонины ууц

Удахгүй "жинхэнэ" шинэ он гарч Монголчууд цагаан сараа тэмдэглэнэ. Бас л өмссөн зүүснээрээ уралдсан, баярхсан шоу битгий болоосой. Иймэрхүү "хоббитой" нөхдийг сайн ичиглэж байя. Бүгдээрээ ичиг ичиг гээд байвал аяндаа тэр өвчин нь илаарших буй заа.  Боломж муутай, зэлмүүн амьдралтай хэсэг маань энэ хийрхэлд автаж битгий чирэгдээсэй, ирэх жил. Боломжоороо идээ засаад сүүтэй зай, буузаа чанаж тавиад сайхан идэж уугаад бөхөө үзсэн шиг амар л даа. Тэр ууц тавьдаг солиотой заншлыг нийтээрээ боливол таарна. Хуучин цагт ууц тавьдаггүй л байсан гэсэн дэг. Сүүлийн үед Монгол уламжлал гэдэг далбаа нэр өгчихөөд янз бүрийн "заншил" их зохиох болж дээ.

Архиар өрсөлдөж, хүний ам руу шахаж цутгадаг тэнэг асуудлаа бас больцгооё та минь!   Таны архиар шахаж ухаангүй болтлоо согтоосон хүн чинь гэртээ хүрэлгүй осгоод үхчихвэл яахав?  Хөл гараа хөлдөөгөөд тайруулчихвал та бид гэмшээд ч барахгүй биз дээ? Согтоож өгөөд машиныг нь  бариулаад явуулж байгаа  бол та алуурчны гарт хутга бариулаад хүн алах "томилолт"  өгөөд явуулсантай  адил хэрэг.  Хүүхэд багачууд минь архинд ороод араас чинь ирж явна. Бодох л хэрэгтэй. Насанд хүрэгчид нь өөрсдөө үлгэрлэхгүй бол архи ууж байгаа хүүхэд залуусаа шүүмжилж мянга хэлээд нэмэр алга.

Мөнгөөр чимсэн гацуур

Манайхны нэг хачин "заншил" бол гацуур модон дээр  цаасан мөнгөний дэвсгэрт тавьж  "чимдэг" явдал. Энийгээ больчихмоор юм. Айлд орж ирсэн хүнээ бас тэр модон дээр мөнгө тавь гэж "дарамталдаг"  гэж байгаа. Дэлхий мэдэж онигоо болохоосоо өмнө энэ "уламжлалаа" бас мартая. Сараагийн "Мартая" дуунд оруулаад нэг бадаг болгоод дуулцгаая.

За тэгээд ирэх жил зовхи нь өөдөө байцгааж  , их хөгжлийн төлөө хамтдаа урагшилцгаая. Хүнийхээ тоотой харьцангуй том газар нутагтай, өчнөөн олон сая малтай, хөрсөн доороо эрдэнээр арвин улсын иргэд бид ингэж ядруу амьдрах ёсгүй биз дээ?! Арай ч дээ. Нэр байна, хор шар байна. Чингис хааныхаа байгуулсан хүчирхэг Монгол улсыг дахин босгох үүрэг өнөөгийн Монголчууд бидэнд оногдож байна.