Кэйфси

Хэт тарган бүсгүйчүүд

Хэт таргалалт бол бүх өвчний үүр үндэс болдог. Ерөөсөө илүү тарга хүний бие, эд эрхтэний хэвийн ажиллагааг алдагдуулж, хамаг юм "бусниулж"  орхидог гэмтэй. Тарган мал тал бүрийн ашигтай гэдэг бол тарган хүний хувьд энэ үг тохирохгүй. Тарган хүн тал бүрийн өвчтэй гэвэл ононо.

Таргалах гол шалтгаан бол гол нь  бидний идэж ууж буй хүнстэй холбоотой. Буруу хүнс, буруу хооллолт. Мэдээж хөдөлгөөн багасах гэх мэтийн олон нөлөөлөх хүчин зүйлүүд бий. Гэхдээ энд хоол хүнсний тухай яръя.

Хүний бие өдөрт ч юм уу авч болох шаардлагатай калорийн хэмжээнээс их калорийг авбал илүүдэл калори нь өөх болж хувирдаг аж. Тэгвэл калори ихтэй хоол хүнс хэрэглэхээс аль болохоор зайлсхийж, илүүдэл калорио биеийн тамир, дасгалаар хичээллэж "шатааж" байх хэрэгтэй болох нь.

"Кэйфси" компаний лого

Түргэн хоолны компаниуд олон оронд сүлжээгээ нээж ажиллуулж байгаа бөгөөд саяхнаас Монгол улсад  KFC буюу Kentucky Fried Chicken (Кентакийн шарсан тахиа) хэмээх сүлжээ анхныхаа салбарыг нээлээ. Хуруу гараа долоон байж идэх тансаг амт гэж байгаа.  Амтын хувьд ч ярих юмгүй. Тийм болохоор ч хаа ч гэсэн хүмүүс хошуурдаг нь ойлгомжтой. 

Гэтэл энэ түргэн хоолны газрууд "хэт таргалах өвчний" гол буруутан нь гэж хэлэгддэг болоод удаж буй. Нэг талаасаа  хүн өөрөө идэх уухаа зохицуулахгүй бол тэдгээр компаниудыг буруутгах нь бас учир дутагдалтай мэт.  Гэвч бас тийм биш бололтой.

АНУ-ын Нью-Иорк хотын иргэн 56 настай Барбер гэгч эр түргэн хоолны   KFC, McDonald's, Wendy"s болон Burger King гэдэг дөрвөн компанийг шүүхэд өгчээ. Шалтгаан нь? Эдгээр компаниудын хоолыг хэрэглэсэний улмаас  тэр залуу хэт таргалаад одоо 122 кг жинтэй болсон гэнэ. Энэ хэрэг чухам яаж шийдэгдэх нь тодорхойгүй боловч хуульчдийн үзэж байгаагаар иймэрхүү түргэн хоолны  компаниуд  үйлчлүүлэгчдийнхээ  хэт таргалалтанд тодорхой хэмжээгээр хариуцлага хүлээх ёстой гэж үзэж байгаа аж. Үүнтэй төстэйгээр  тамхины компаниудыг шүүхэд өгсөн тохиолдол хэд хэд гарч байсан юм. 2000 онд 8000 хохирогчдод нийт 145 тэрбум долларын төлбөр төлүүлэх шийдвэр шүүхээс гаргаж байсан байх юм. 2008 онд Смит гэгч иргэн R.J.Reynolds  хэмээх (Монголчуудад танил болсон "Camel", "Winston", "Magna", "Salem" зэрэг тамхийг үйлдвэрлэдэг) тамхины компаний эсрэг гомдол гаргаад 2012 онд 27 сая доллар авсан жишээтэй.

Хэт тарган хүү

Өнгөрсөн жил  гаргасан мэдээгээр АНУ-д хэт таргалалтын улмаас жилд 300 мянган хүн өөд болдог гэсэн байх юм. Манайд дээр нэр дурдсан түргэн хоолны компаниудаас түрүүлж "Кэйфси" орж ирсэн бөгөөд яваандаа бусад нь салбараа нээхийг үгүйсгэх аргагүй. Монголд салбараа нээж үйл ажиллагаа явуулах нь ажлын байр нэмэгдэж, төсвийн орлогод сайнаар нөлөөлөх  боловч нөгөө талаас иргэдийн маань эрүүл мэндтэй холбоотой асуудал бий болох магадлалтай учраас эрүүл мэндийн байгууллага, иргэд маань өөрсдөө бас анхаарах, болгоомжлох хэрэгтэй болж байна. Хамгийн энгийн арга бол иймэрхүү төрлийн хоолыг байнга идэхээс  аль болохоор татгалзаж, хааяа нэг хэрэглэж байвал хэт таргалахгүй байх боломжтой. 
Ялангуяа хүүхэд, залуучууд маань хэрэглээгээ хязгаартай байлгаж, эцэг эхчүүдээс ч энэ тал дээр зөв ойлголт өгч зөвлөж байх нь чухал.

МкДоналд'с хоолны газар хооллож буй хүүхэд

Өсвөр үеэ хэт таргалах аюулаас сэргийлж чадаж байвал иргэд маань эрүүл байна. Эрүүл иргэдтэй бол улс орон маань ажлын чадвартай, бүтээлч ажиллах хүчинтэй байж чадна. Иймээс  тарган хүн тал бүрийн өвчтэй, ажлын чадвар муутай, бүтээлч байж чаддаггүй  гэдгийг хүн бүр санаж сэргийлж явбал болох нь тэр дээ. "Кэйфси"-тэй шүүхдэлцэхгүйгээр өөрсдийнхөө болон  хүүхдүүдийнхээ зөв хөгжил, эрүүл мэндэд эхнээс нь анхаарч явахыг эцэг эхчүүддээ уриалая даа. Болж өгвөл сардаа нэг удаа л орж байгаарай, please!