Хатнаа ба түүний команд

Хатнаа ба түүний команд (Хатнаа урд эгнээний голд) 

Хатнаа нэрээрээ Фейсбүүк дээр танил болсон Хандсүрэнгийн Хатанбаатар гэдэг залуу болон түүний багийнхны амжилтын  тухай энд өгүүлнэ. Монголын Оюун Ухааны академийн захирал энэ залуу Монголын нэрийг дэлхийд дуурсгахад үлэмж зүтгэл гаргаж амжилтанд хүрч байгаа гавъяатан. Төр засаг энэ гавъяаг нь үнэлэх ёстой гэж бодож байна.  Сая Хятадад болсон ээлжит Ой тогтоолтын дэлхийн аваргын тэмцээнд Монголын баг 2-р байранд оржээ. Лондонд болсон өмнөх тэмцээнд Германы ард орж 3-р байр эзэлж байсан бол энэ удаа немцүүдийг гүйцэж түрүүлэн аман хүзүүдсэн байна. Хурай!
Дунд насны ангилалд Монголчууд дэлхийд "азаргалж" байна. Энэ  хүүхдүүд  нас бие гүйцээд  ирэхийн цагт насанд хүрэгчдийн ангилалд Монголчууд дэлхийд ноёрхох болно.  Ийм л төлөв харагдаж байна. "Бүдүүлэг барбарууд" оюун ухаан сайтай гэдгийг дэлхийд нотолж,  Монгол хүний потенциалыг харуулж чадсан явдал бол Хатнаа ба  түүний командын гавъяа. Дан ганц биеийн хүч тэнхээ, сэлэмний ирээр биш бас оюун ухаан сайтайдаа   дэлхийг захирч байсан улс юм шүү гэдгийг нотлоод байгаа хэрэг. Монголын тухай эерэг суралчилгаа харамсалтай нь маш бага байдаг нь дэлхийгээр хэрэн бэдрэгч Монголчуудад алхам дутамд нь мэдрэгдэж бухимдуулдаг. Их л бодож Чингис хааныхаа нэрээр түрээ барих боловч их хаантан маань сүүлдээ явсаар хятадынх болж хувирсаныг чихээрээ сонсож дуулаагүй цагаач Монгол байдаг юм уу? Монгол гэхээр Хятадын харъяат биз дээ гэж асуух нь наад захын хэрэг. Хятадын их "тархи угаалтын" компанит ажлын уршгаар дэлхий өнөөдөр ийм ойлголттой болжээ.

Хэдийгээр түүхийн үйл явдлыг арай зөв талаас нь харуулсан ном зохиол ганц нэг гарч байгаа ч гэсэн дээрх буруу нийтлэг ойлголт  амархан засагдахгүй. Монгол гэж агуу түүхтэй улс байдаг бөгөөд Монголчууд гэж оюунлаг мундаг хүмүүс байдгийг Хатнаа ба түүний команд  дэлхийд сурталчилж байна. Бусад спортын төрөл дээр амжилт гаргаж эх орныхоо нэрийг гаргаж байгаа тамирчид ч мөн ялгаагүй  Монголыг "рекламддаг."  Дэлхийн аваргын тэмцээнд улсынхаа далбааг мандуулсан тамирчин мөнгөн шагнал авдаг. Хатнаагийн баг сая Хятадад болсон дэлхийн аваргын тэмцээнд  2-т оржээ. Адилхан л спорт. Адилхан амжилт. Адилхан л үнэлэх ёстой. Багаар нь шагнаж боломгүй бол тодорхой төрлүүд дээр медальт байранд орсон тамирчдыг нь шагнах хэрэгтэй.  Бага ч гэсэн  мөнгөн  шагнал өгвөл тэдэнд их урам хайрлах болно. Хэдийгээр оюуны тэмцээн бусад төрлийг, жишээ нь жю-дог, бодвол нийтлэг биш ч гэсэн ямар ч байсан улсынхаа нэрийг гаргаж, дэлхийд сурталчилж байгаа нь хамгийн чухал учраас төр засгаас тодорхой хэмжээгээр үнэлэх нь шударга гэж бодно.  Монголчуудыг оюунлаг, ой ухаан сайтай ард түмэн гэдгийг нотолж сурталчилж байгаа нь өөрөө  онцгой бахархмаар "реклам."

Монгол Улс багаараа мөнгөн медаль авсан тухай гэрчилгээ

Харьцангуй залуу спортын төрөл боловч  өөрийн өвөрмөц онцлогоороо  аль хэдийн дэлхийн  орнуудын сонирхлыг татаж эхэлжээ. 2013 оны байдлаар улс орнуудын  чансааны жагсаалтанд Монгол Улс  Швед, Германы дараа 3-т бичигдсэн байна.  Сая Хятадад болсон  2014 оны дэлхийн аваргын тэмцээнд Монголын баг 2-т орсон болохоор чансаа дээшилж ч магад. Хэрэв тэгвэл Шведийн дараа орох нь байна.  Удахгүй номер нэг ч болох юм бил үү. Саяын тэмцээнд Янжаа гэдэг хүүхэн нэг алт, бас бус медаль авч Шведийн багийг түрүүлэхэд овоо оноо "цуглуулж  өгсөн" байх. Цуглуулж өгсөн гэдэг нь Янжаа маань Монгол бүсгүй боловч Шведийн нэрийн өмнөөс тэмцээнд орсон учраас тэгж хэлж байгаа юм л даа. Хэрвээ Янжаа Монголын багт байсан бол байдал яаж ч эргэх байсан юм билээ гэж. Гэхдээ тэр хүний хувийн асуудлыг хөндөх гэсэнгүй, зүгээр л "хийсвэрлэж" байгаа ухаантай юм шүү. Жаахан наргиад хэлчихэд Шведийн баг нэг Монгол хүүхний тусламжтайгаар Монголын багийг ялж түрүүллээ гэж. За наргиа яахав.
Эцэст нь,  Хатнаа ба түүний командынханд спортын өндөр амжилт хүсье!   Монголчууд та нараар бахархаж байгаа шүү! Үзүүлээд өгөөрэй!